TURISTIK MAJMUALARNI BOSHQARISHDA KOORDINATSIYA BO‘SHLIG‘I VA UNI RAQAMLI PLATFORMA ASOSIDA BARTARAF ETISHNING KONSEPTUAL MODELI
O‘zbekistonda turistik oqimning keskin o‘sishi va sohani raqamlashtirish siyosati sharoitida bir hududda faoliyat yurituvchi mustaqil subyektlar o‘rtasidagi kundalik hamkorlik turistik majmua samaradorligining hal qiluvchi omiliga aylanmoqda. Maqolada turistik majmualarni boshqarishning nazariy asoslari koordinatsiya nazariyasi nuqtai nazaridan qayta ko‘rib chiqilgan. Tadqiqotning maqsadi ilmiy adabiyot va me’yoriy hujjatlarda turistik majmua ichidagi kundalik koordinatsiya qay darajada yoritilganini aniqlash hamda uni raqamli platforma asosida tashkil etishning konseptual modelini ishlab chiqishdan iborat. Integrativ adabiyotlar sharhi va deduktiv sifat kontent-tahlili usullari qo‘llanildi: destinatsiya va boshqaruv, klaster, aqlli turizm hamda platforma ekotizimi yo‘nalishlariga mansub 24 ta ilmiy manba hamda to‘rtta milliy me’yoriy hujjat besh mezon bo‘yicha 0–2 shkalada kodlandi. Natijalarga ko‘ra, manbalarda tarmoq o‘lchovi eng to‘liq yoritilgan (qamrov indeksi 0,77), raqamli koordinatsiya vositasi esa o‘rtacha darajada (0,50) ochilgan. Biroq mezo, ya’ni majmua darajasida tahlil qilingan manbalarda raqamli vosita qamrovi atigi 0,12 ni tashkil etdi. Tarmoq, koordinator subyekt va raqamli vositani birgalikda chuqur ko‘rib chiqqan sakkizta manbaning birortasi ham majmua darajasida emas. Milliy me’yoriy hujjatlarda ham raqamli koordinatsiya milliy platforma darajasida belgilangan, klaster maqomi esa ishtirokchilar o‘rtasidagi ichki koordinatsiya tartibini nazarda tutmaydi. Shu asosda “koordinatsiya bo‘shlig‘i” tushunchasi aniqlashtirildi, turistik majmuaning muallif ta’rifi berildi hamda makonresurs, tarmoq, rivojlanish va integrallovchi koordinatsiya o‘lchovlaridan iborat to‘rt o‘lchovli model taklif etildi. Modelda majmuadagi uch turdagi bog‘liqlik (umumiy resurslar, ketma-ket xizmatlar va bir vaqtdagi talab) muayyan platforma mexanizmlari va o‘lchanadigan ko‘rsatkichlar bilan bog‘langan. Natijalar majmua darajasidagi raqamli platformani milliy yagona turizm platformasini to‘ldiruvchi koordinatsiya qatlami sifatida loyihalash uchun nazariy asos bo‘lib xizmat qiladi. Ishning cheklovlari va keyingi empirik tadqiqot yo‘nalishlari ham ko‘rsatib o‘tilgan.
Authors
- Hasanjon Sirojiddinov
Publication Details
- Journal
- Innovations in Science and Technologies
- Published
- 2026-11-12
- Primary Topic
- Diverse Aspects of Tourism Research
- Type
- article
- Field-Weighted Citation Impact
- 0.00