RAQAMLI TA’LIM MUHITI VA IJTIMOIY TARMOQLAR DISKURSDA TALABALARNING DAVLAT TILINI QO‘LLASH MADANIYATINI RIVOJLANTIRISH METODIKASI

Mazkur ilmiy-uslubiy maqolada raqamli transformatsiya va axborotlashgan jamiyat sharoitida oliy ta’lim muassasalari talabalarining ijtimoiy tarmoqlar hamda virtual muloqot platformalarida o‘zbek davlat tilini qo‘llash madaniyatini rivojlantirishning pedagogik va sotsiolingvistik mexanizmlari tadqiq etilgan. Tadqiqotning asosiy maqsadi virtual diskursda kuzatilayotgan grafik, orfografik, leksik-semantik hamda sintaktik-punktuatsion deviatsiyalarni (me’yordan og‘ishlarni) empirik jihatdan tasniflash va ularni bartaraf etishning zamonaviy lingvodidaktik hamda raqamli-texnologik yechimlarini ishlab chiqishdan iborat. Tadqiqot jarayonida kompyuter vositali muloqot (CMC) nazariyasi, lisoniy tejamkorlik qonuniyati hamda raqamli kontent-tahlil metodlariga tayanilib, talaba-yoshlar faol foydalanadigan virtual muloqot maydonlaridagi yozma nutq namunalari o‘rganildi. Empirik tahlil natijasida virtual muloqotda adabiy til me’yorlarining buzilishi beshta tipologik guruhga (orfografik reduksiya, grafik deformatsiya, leksik varvarizmlar, gibridlashgan fe’l qurilmalari va emotsional punktuatsiya) ajratildi. Shuningdek, maqolada oliy ta’lim tizimida ijtimoiy-gumanitar va filologik fanlarni o‘qitish jarayonini raqamli mediata’lim bilan integratsiyalash, sun’iy intellektga asoslangan milliy imlo va uslub tahrirchilarini (spell-checker) ta’lim amaliyotiga joriy etish hamda talabalarda raqamli kommunikativ kompetensiyani shakllantirishning bosqichma-bosqich pedagogik modeli asoslab berilgan.