O'ZBEKISTON QIMMATLI QOG'OZLAR BOZORINING KAPITALLASHUV DARAJASI: STATISTIK TAHLIL (2021-2025)

Ushbu maqolada O'zbekiston qimmatli qog'ozlar bozorining kapitallashuv darajasi 2021-2025 yillardagi statistik ko'rsatkichlar asosida tahlil qilingan. Tadqiqotda "Toshkent" Respublika fond birjasi (RFB) ma'lumotlari, ILMA taqdimoti, Markaziy bank hisoboti va CEIC bazasi o'zaro solishtirildi. Hisob-kitoblar shuni ko'rsatdiki, aksiyalar bozorining kapitallashuvi 2021-yildagi 56,2 trln so'mdan 2025-yilda 284,6 trln so'mgacha, ya'ni 5 baravardan ko'proq o'sgan (o'rtacha yillik o'sish 50,0 foiz), biroq zanjirli o'sish sur'ati 2023-yildagi 181,6 foizdan 2025-yilda 117,4 foizgacha sekinlashgan. Kapitallashuvning YaIMga nisbati 7,65 foizdan 17,2 foizga ko'tarilgan bo'lsa-da, erkin muomaladagi aksiyalar ulushi YaIMning 0,4 foizi atrofida qolgan, savdo aylanmasi esa 2025-yilda kapitallashuvning atigi 6,2 foizini tashkil etgan. Natijalar bozorning chuqurligi va likvidligi hajmdan ortda qolayotganini ko'rsatadi. Maqola oxirida erkin muomaladagi aksiyalar ulushini oshirish va statistik hisobni takomillashtirish bo'yicha takliflar berilgan.