CHUQUR KARIYESNI BIOLOGIK DAVOLASH VA PULPA HAYOTIYLIGINI SAQLASH

Chuqur kariyes stomatologik amaliyotda keng uchraydigan kasalliklardan biri bo'lib, o'z vaqtida va to'g'ri davolanmasa, tish pulpasida qaytmas yallig'lanish jarayonlari rivojlanishiga olib kelishi mumkin. Zamonaviy terapevtik stomatologiyaning asosiy vazifalaridan biri pulpaning hayotiyligini saqlash, tishning anatomik va funksional yaxlitligini ta'minlash hamda endodontik davolashga bo'lgan ehtiyojni kamaytirishdan iborat. Biologik davolash usullari pulpaning reparativ imkoniyatlaridan foydalanish, mikroorganizmlar faoliyatini nazorat qilish va dentin to'qimalarining tiklanishini rag'batlantirishga asoslanadi. Ushbu maqolada chuqur kariyesni biologik davolashning zamonaviy tamoyillari, bilvosita va bevosita pulpa qoplash usullari, qo'llaniladigan biomateriallar hamda davolash samaradorligiga ta'sir qiluvchi klinik omillar yoritilgan.