IQTISODIY O'SISH VA EKOLOGIK BARQARORLIK O'RTASIDAGI O'ZARO BOG'LIQLIK VA ULARNI BAHOLASH YONDASHUVLARI

Maqolada iqtisodiy o'sish va ekologik barqarorlik o'rtasidagi o'zaro bog'liqlikning nazariy asoslari yoritilgan va uni baholashning asosiy yondashuvlari qiyosiy tahlil qilingan. Tapio ajralish indeksi hamda Kaya ayniyatiga asoslangan LMDI dekompozitsiya usuli O'zbekistonning 2000–2024-yillar ma'lumotlariga qo'llanilgan. Natijalar shuni ko'rsatdiki, mazkur davrda real YaIM 4,7 baravar o'sgan, CO₂ chiqindilari esa atigi 12,9 foizga oshgan, ya'ni kuchsiz ajralish kuzatilgan. Biroq 2015-yildan keyin ajralish elastikligi 0,54–0,66 gacha ko'tarilgan. Buning asosiy sababi energiya sig'imini kamaytirish salohiyatining qisqarib borayotganidir: 2016–2023-yillarda bu omil chiqindilarni atigi 13,8 mln tonnaga kamaytirgan, 2000–2010-yillarda esa 91,2 mln tonnaga kamaytirgan edi.