O'ZBEKISTONDA RAQAMLI IQTISODIYOT RIVOJLANISHINING ASOSIY STATISTIK KO'RSATKICHLARI: INTERNETDAN FOYDALANISH, ELEKTRON TO'LOVLAR, ONLAYN SAVDO VA RAQAMLI XIZMATLAR TAHLILI

Raqamli iqtisodiyot O'zbekiston iqtisodiyotining muhim drayveri bo'lib, uning rivojlanishi mamlakatning global raqobatbardoshligini oshirishda hal qiluvchi ahamiyatga ega. Biroq, raqamli iqtisodiyotning asosiy segmentlari bo'yicha statistik ko'rsatkichlarning tizimli tahlili yetarlicha o'rganilmagan. Ushbu tadqiqotning maqsadi O'zbekistonda raqamli iqtisodiyot rivojlanishining asosiy statistik ko'rsatkichlarini tahlil qilish va uning istiqbollarini baholashdan iborat. Tadqiqotda internetdan foydalanish darajasi, elektron to'lovlar va onlayn savdo hajmining dinamikasi statistik ma'lumotlar asosida tahlil qilingan. 2023-yil holatiga ko'ra, O'zbekiston aholisining 85,6% dan ortig'i internetdan faol foydalanadi, bu 2020-yilga nisbatan qariyb 1,5 barobar o'sishni ko'rsatadi. Mobil internet foydalanuvchilari soni 31,5 milliondan oshgan. So'nggi uch yil ichida elektron to'lovlar hajmi 2,5 barobarga o'sgan, mobil to'lovlar esa 2023-yilda umumiy elektron to'lovlar hajmining 70% dan ortig'ini tashkil etgan. Ushbu ko'rsatkichlar raqamli iqtisodiyotning jadal rivojlanishini tasdiqlaydi va mamlakatning iqtisodiy o'sishi uchun muhim zamin yaratadi.