Aşağı ətraflarda xroniki venoz xoraların optimallaşdırılmış müalicəsinin proliferasiya prosesinin nəticələrinin təhlili

Məqalə aşağı ətrafların xroniki venoz xoralarının müalicəsində endovenoz lazer ablasiya (EVLA), “Venocoryl” məlhəmi və az intensivlikli lazeroterapiyanın kombinə edilmiş tətbiqinin effektivliyini morfohistoloji parametrlər üzrə təhlili məqsədilə aparılmış tədqiqat işinə əsasən yazılmışdır. Tədqiqata varikoz xəstəliyi fonunda trofik xora olan 75 xəstə daxil edilmiş və onlar üç qrupa bölünmüşdür. I qrupda EVLA və mini-fleboektomiya, II qrupda EVLA, mini-fleboektomiya və “Venocoryl” məlhəmi, III (əsas) qrupda isə EVLA, mini-fleboektomiya, “Venocoryl” məlhəmi və az intensivlikli lazeroterapiya kombinə şəkildə tətbiq edilmişdir. Müalicənin 1-ci, 7-ci və 14-cü günlərində götürülmüş biopsiya materiallarında epitelial və subepitelial morfoloji parametrlər 4 ballıq sistem üzrə qiymətləndirilmişdir. Nəticələr göstərmişdir ki, bütün qruplarda iltihab göstəriciləri dinamik olaraq azalmışdır. Lakin əsas qrupda mononuklear leykositlərin infiltrasiyası, mikrosirkulyasiyada hialin tromblar daha sürətlə geriləmiş, fibroz və kollagen liflərin proliferasiyası isə daha intensiv olmuşdur (p˂0,05). Alınan nəticələr kombinə edilmiş müalicə üsulunun mikrosirkulyasiyanın daha erkən bərpasına şərait yaratdığını göstərir.