XRONİK DESTRUKTİV AĞCİYƏR VƏRƏMİ OLAN XƏSTƏLƏRDƏ METOPROLOLUN ANTİARİTMİK İMKANLARININ QİYMƏTLƏNDİRİLMƏSİ

Məqalədə II-III funksional sinfə aid olan xronik ağciyər vərəmli xəstələrdə kardioselektiv β-blokator metoprololun antiaritmik təsirini araşdırmaq üçün aparılan tədqiqatın nəticələri təqdim olunmuşdur. Tədqiqat işinə 80 xəstədən 66-ü daxil edilmişdir. Əsas qrupa aid olan xəstələrə (33 xəstə) standart müalicə ilə yanaşı metoprolol istifadə edilmiş, əlavə qrupa aid olan xəstələrə (33 xəstə) antiaritmik dərmanlar təyin edilməmişdir. Tədqiqatın nəticəsində xronik destruktiv ağciyər vərəmi olan xəstələrdə baş verən mədəcik və supraventrikulyar aritmiyalar zamanı metoprololun nəzərəçarpan antiaritmik təsiri müəyyən edildi. II və III FS- ə aid olan xəstələrdə metoprololun istifadəsi fonunda bronx obstruksiyasının artması və ya restriktiv dəyişikliklərin dərinləşməsi müşahidə edilmədi ki, bu da dərmanın kardioselektivliyi ilə izah olunur.