YASHIL OBLIGATSIYALARNING IQTISODIY MOHIYATI VA TURLARI

So‘nggi yillarda global iqtisodiyotda ekologik barqarorlikni ta’minlash, iqlim o‘zgarishi oqibatlarini yumshatish hamda tabiiy resurslardan oqilona foydalanish masalalari ustuvor ahamiyat kasb etmoqda. Ushbu jarayonda moliya bozori instrumentlari orqali ekologik loyihalarni moliyalashtirish muhim o‘rin tutadi. Shunday moliyaviy instrumentlardan biri yashil obligatsiyalar hisoblanadi. Yashil obligatsiyalar iqtisodiyotning ekologik jihatdan barqaror rivojlanishini ta’minlash, qayta tiklanuvchi energiya manbalarini rivojlantirish, energiya samaradorligini oshirish va atrof-muhitni muhofaza qilishga qaratilgan loyihalarni moliyalashtirish imkonini beradi.