MUDDATLI VA JAMG'ARMA DEPOZITLARI BO'YICHA OPERATSIYALAR HISOBI

Muddatli va jamgʻarma depozitlari bo‘yicha operatsiyalar hisobi tijorat banklarining moliyaviy barqarorligini ta'minlash hamda depozit siyosatini samarali yuritishda muhim ahamiyat kasb etadi, shu sababli ushbu jarayonlarni buxgalteriya hisobida toʻgʻri aks ettirish masalasi dolzarb ilmiy muammo sifatida namoyon boʻlmoqda. Tadqiqot davomida tizimli tahlil, iqtisodiy taqqoslash va amaldagi bank amaliyotlarini oʻrganish usullaridan foydalanilib, depozit operatsiyalarining hisobini yuritish mexanizmlari ilmiy jihatdan tahlil qilindi. Tadqiqot natijasida muddatli va jamgʻarma depozitlarini rasmiylashtirish, foizlarni hisoblash hamda ularni moliyaviy hisobotlarda aks ettirish jarayonlarida uchraydigan asosiy muammolar aniqlandi va ularni bartaraf etishga qaratilgan amaliy yondashuvlar ishlab chiqildi. Shuningdek, depozit operatsiyalarini hisobga olishda ichki nazorat tizimini kuchaytirish bank resurslaridan foydalanish samaradorligini oshirishga xizmat qilishi asoslab berildi. Tadqiqot yakunida depozit operatsiyalarining toʻgʻri va shaffof hisobini yuritish banklarning moliyaviy ishonchliligini mustahkamlashi hamda mijozlar ishonchini oshirishda muhim omil ekanligi xulosa qilindi.