OʻZBEKISTON RESPUBLIKASIDA NAQD PULSIZ HISOB-KITOBLARNI RIVOJLANTIRISH ISTIQBOLLARI

Oʻzbekistonda naqd pulsiz hisob-kitob tizimini rivojlantirish iqtisodiyotning raqamlashtirilishi, moliyaviy shaffoflikni ta’minlash va zamonaviy toʻlov infratuzilmasini takomillashtirish nuqtai nazaridan dolzarb ilmiy masala hisoblanadi. Tadqiqotda tizimli tahlil, iqtisodiy taqqoslash va normativ-huquqiy hujjatlarni o‘rganish metodlari asosida mamlakatdagi naqd pulsiz hisob-kitoblarning amaldagi holati va rivojlanish tendensiyalari baholandi. Tadqiqot natijalariga ko‘ra, raqamli bank xizmatlari, mobil to‘lov tizimlari va elektron tijoratning kengayishi naqd pulsiz operatsiyalar hajmining ortishiga ijobiy ta’sir ko‘rsatayotgani aniqlandi. Shu bilan birga, ayrim hududlarda raqamli infratuzilmaning yetarli rivojlanmaganligi, aholining moliyaviy savodxonligi darajasidagi tafovutlar hamda axborot xavfsizligi bilan bog‘liq muammolar tizim samaradorligini cheklovchi omillar sifatida baholandi. Tadqiqot davomida banklar va to‘lov tashkilotlari o‘rtasidagi integratsiyani kuchaytirish, innovatsion moliyaviy texnologiyalarni joriy etish hamda aholining elektron to‘lov vositalariga bo‘lgan ishonchini oshirish naqd pulsiz hisob-kitoblarni rivojlantirishning ustuvor yo‘nalishlari ekanligi asoslandi. Xulosa sifatida, naqd pulsiz hisob-kitob tizimini izchil takomillashtirish mamlakat moliya tizimining barqarorligini mustahkamlash, iqtisodiy operatsiyalar shaffofligini oshirish va raqamli iqtisodiyot rivojiga xizmat qilishi ta’kidlandi.