Jökulhlaup úr Fossadal í Esjufjöllum

Á síðustu áratugum hefur myndast jökulstíflað lón í Fossadal í Esjufjöllum á milli Vesturbjarga og Skálabjarga í kjölfar jökulhörfunar. Tjarnir mynduðust fyrst í Fossadal á níunda áratug síðustu aldar en lónið, eins og það er nú, hafði tekið á sig mynd í kringum árið 2005. Þegar lónið nær nægri hæð hleypur vatnið undir Esjufjallajökul og skilar sér í Jökulsárlón á Breiðamerkursandi. Þetta eru lítt áberandi jökulhlaup þar sem Jökulsárlón dempar þau og áhrif þeirra í byggð eru því lítil. Þess eru dæmi að aukið vatn vegna jökulhlaupa hafi fært gönguleiðir við Jökulsárlón á kaf, rennsli Jökulsár á Breiðamerkursandi hafi aukist til muna og ísjakar hrannast upp við útfallið úr lóninu. Á vatnsborðsstöð Veðurstofu Íslands sjást skyndilegar breytingar á vatnsborði Jökulsárlóns við flest hlaupanna. Tekist hefur að tímasetja tíu jökulhlaup úr Fossadalslóni sem öll urðu að sumarlagi, það fyrsta árið 2010. Fylgst var með slíku hlaupi dagana 12.–14. júlí 2025 en þá voru liðin tvö ár frá síðasta jökulhlaupi. Búnaður var settur upp til að skrásetja atburðinn á myndrænan hátt með nákvæmum tímasetningum. Hlaupið hófst með jöfnum leka en að 37 klukkustundum liðnum jókst útrennsli og kraftmikið hlaup úr lóninu stóð í tæpan sólarhring. Hlaupið skilaði um 45 milljón m³ vatns úr Fossadalslóni og rennsli í hámarki var um 415 m³/s. Skjálftamælir Veðurstofu Íslands í Káraskeri í Breiðamerkurjökli nam óróa frá hlaupinu.