Испитување на ефектите на адаптогените хербални препарати воподобрување на когнитивните функции кај студентската популација

Адаптогените дроги се природни хербални супстанции кои ја зголемуваат отпорноста на организмот кон стрес, ја одржуваат хомеостаза и потпомагаат да се зачува здравјето при влијание на каков било стрес фактор. Адаптогените дроги ја подобруваат менталната издржливост без да ги нарушат физиолошките функции. Женшен (Panax ginseng), ашваганда (Withania somnifera) и гинко билоба (Ginkgo biloba) се најчесто користени адаптогени. Истражувањето беше спроведено преку анкетен прашалник со 19 прашања, пополнет од 105 студенти на Факултетот за медицински науки (87 женски, 18 машки, на возраст од 18 до 40 години). Од нив, 45,7% користеле хербални препарати (гинко билоба (40%), ашваганда (38%) и женшен (9%), а 14% други хербални препарати со седативно дејство, со цел подобрување на когнитивните функции или намалување на стресот, во форма на таблети или капсули. Најчесто ги употребувале за време на испитна сесија (26,3%) во период од неколку дена (48,2%). Повеќето истовремено консумирале кафе (67,4%) и енергетски пијалаци (14,6%) за зголемена будност и ментален фокус. Испитаниците пријавиле најсилен ефект врз намалување на стресот (39,1%), подобрување на концентрацијата и менталната будност (30,4%), додека 27,5% не забележале ефект. Несакани ефекти (тахикардија, мачнина, повраќање) биле пријавени од 10,6% од испитаниците. Од добиените резултати може да се заклучи дека значителен дел од студентите користат хербални препарати со цел подобрување на когнитивните функции и справување со стрес. Сепак, постои потреба од подобра едукација во однос на времетраењето и начинот на примена на овие препарати, со цел да се постигне максималниот посакуван ефект со минимален ризик од несакани дејства на екстрактите добиени од адаптогени дроги