Titlatehtemozceh huan titlayoltilizceh ica tomacehualtlahtol huan tomacehualtlallamicca: ¿queniuhqui titequitizceh?

Ipan cempohualli hueyixihuicahuitl huan naman tonatiuh coyomeh tlen zancapahueli tlalli quichiuhtihualtoqueh tlatehtemoliztli zan ica inintlallamiquiliz campa moixnextihtihualtoc nahuatlahtolli huan macehualtlallamiccayotl. Pan ni amatlahcuilolli nizaniloa queniuhqui macehualmeh tlen naman tiquittah inintequiuh coyomeh tlatehtemoanih tlen tlahcuiloah ica macehualtlallamiccayotl, huan nouhquiya niquihtoa tlen monequi ticchihuazceh macehualmeh tlen Mexcotlalli pan tlatehtemoliztequitl tlen ica titlahtolyoltilizceh nahuatlahtolli. Nouhquiya nizaniloa ica quizaliztli campa ticcauhtehuah toaltepehuan huan quichihua ma tizanilocan ceyoc tlahtolli huan pehuah timoixpatlah. Ica totlamachtiliz tlen ticcuitoqueh naman, nizaniloa ica ce yancuic ohtli campa ticchihuazceh tlatehtemoliztli pan toaltepehuan. Na niquitta quemman macehualmeh ticchihuah ce tequitlatehtemoliztli, achtohui ticcalaquih tiquixmatih tomacehualtlallamicca ica toyoltlallamiquiliz campa timochomoniah ica tlahtolyoltiliztli. Temachtli ticchihuah tequitl ica totlahtol campa tictequihuiah tonantlahtol huan teipan ticpannextiah macehualtlamatiliztli ipan caltlamachtiloyan huan nouhquiya ipan toaltepehuan.